هحكي حكايه
وكان ياما كان
قالولنا جدودنا
واهل زمان
ما يحلي كلامكم
في اي مكان
الا بذكر النبي
عليه الصلاة والسلام
كان فيه زمان
قلب كبير
طاير حر
كما العصافير
قلب يحب
كل الناس
قلب بجد
مليان بالخير
يقوم من بدري
يشكر ربه
ويقوله ياربي
ملياش غيرك
رب قدير
قلب حنين
عارف وجبه
وكل الناس
كمان بتحبه
وتقول دا امير
حب اميره
زي القشطه
وشها ابيض
زي الفضه
بشعر حرير
وهي كمان
حبه ملاها
وطار في سماها
ورفرف فيها
زي الطير
بس وبعدين
يا ساده يا كرام.
واخدين بالكم...
سامعيييين؟
بنحكي حكاية
عشق زمان
اكملهالكوا ؟
احنا وقفنا لغاية فييين؟
اه!!
عاشوا صحابنا
سنين قدام
في حب وعشق
وشوق وغرام
لحد ما جه
عفريت شرير
فرق بينهم
جه ومعاه
سحر خطير
خطفها وطار
وعدي بحار
وخدها سجنها
في اغوط بير
والقلب الطيب
يبكي حزين
ويأن سنين.
بجسم عليل
نايم في سرير
وسنين عدت
تجر سنين
لحد صاحبنا
ما قام من نومه
وسخر نفسه
لراحة الغير
راح واتعلم
علي ايد سحار
يطير في الجو
يطلع نار.
نار بتنور
مش تدمير
سخر نفسه
يقول اشعار
يرسم بسمه
يمسح دمعه
يصحي ضمر
في كل مكان
وفي اي زمان
لو مين يندهلو
الساحر الابيض
قلبه كبير
توته توته
ومخلصتشي الحدوته
ليست هناك تعليقات:
إرسال تعليق